الصياد الاحول

السلام عليكم ورحمة الله وبركاته 

الصياد الاحول 

حامل بندقتي على كتفي .. وماشي نتستل في الوادي 

قدامي نطت ارنوبة ..

صوبت ونشنت عليها .. غمضت يميني انسيت لليسرى معطوبة 

اخطت الارنب صمتت كلبتنا .. عوت قفزت زي المكلوبة 

كتحت على راسي الرملة .. سلوقيتنا ياظنى عمي 

جو يجرو كيف اللهلوبة 

الساكت والفازع وارحومة .. في الجرف الغارق ياخوتي 

فيهم صارت عملة سودة 

ارحومة المتعصبن بوذراع .. وهو يجري اعتر في سوريته 

طاح اتكركب زي الكورة 

ثلاث اضلوع الي انكسروله وايده .. راسه مدموغ ورجله من المشطة مشعوبة 

ماليشي شهرين امعرس .. حظه في الدنيا ومكتوبه 

واخد بنت سليمة العورة 

حطينا المنجل عالنار .. بنكوه لتسقيم ضلوعه 

اخدينا من المعزة شعرات .. حلبة ودحية وصلفاقات 

باش انجبس رجله وايده 

يطغي ويربش زي الفروج .. يسكر يفتح في قروشه 

سنونه سود كما المرعوبة 

انصبر فيه انا والفازع ..  تحمل يا ارحومة 

والساكت يدرف في دموعه 

فنص فيا شتمني وقال .. كيف تجي هاذي 

احول يتصيد ارنوبة . 
قلب عيونه ورخي دقنه .. وراح فغيبوبة .

*********************************************

مع تحيات : سالم منصور يونس الطبيب .